Mara a Brundisi, comu s’è ritotta,
pi ci è pinzatu sulu alla pagnotta.
Puviredda! Cè brutta fini è fatta,
no’ l’è rumastu nienti cu si cratta.
Nc’era Lu Parcu ti li Rimimbranzi
e a Via Lata lu Sciardinu ti li Danzi,
distrùssara lu vecchiu Tiatru Verdi,
ca li mutivi è mègghiu cu ti scuèrdi.
La Torri ti l’Orologgiu fo’ sgarràta
e quedda no’ fo’ l’ùrtama cazzata.
Lu Tiatru Nuevu, pi’ anni fo’ bbloccàtu,
e no’ sulu pi li scavi ch’annu acchiàtu.
Tanti li leggi assùti sin’a moni,
cangiàra tuttu, futtèra li poltroni.
Bbandunàtu ristàu lu Tummasèu,
“veru gioiellu”, ticìa Cocu Mèu.
Lu Portu, ch’èra èssiri ricchezza,
ci lu uàrdi ti cala nna tristezza.
Passàu lu tiempu ti navi tuttu chinu
E mo’ no’ rriva mancu nnu trainu.
Non resta né ricordu, né mimoria,
ncunu ritrattu ti cunsigna’ alla storia.
Porta t’Orienti, si ticìa nna vota,
e mo’ sta Porta non è cchiù ti mota.
A Fiumi Crandi e Santa Pulinàri,
passavi li sciurnàti ‘n mienzu a mari,
taièddi chini, muloni sarginiscu
ti ncilunàvi e rumanivi an friscu.
Li strati e bbacchittùni sgarrupàti,
ci no’ ti sciànchi, già, simu furtunati,
no’ nni parlàmu, poi, ti spazzatura,
è croci vecchia, è propria nna svintùra.
Nd’ànnu purtatu tuttu, resta nienti,
pi’ corpa ti nna massa ti fitiènti.
Malitiziùni sirài nd’hannù minàti
ci a sta pena simu cundannàti!
Ncignàra cu ndi llèunu la Culonna,
priàmmu li Santi e puru la Matonna,
ma li pòppiti ca a Brindisi ’rrivàra
si la smuntàra e si la carisciàra.
A Lecci, nci pusàra Santu Ronzu
e Brindisi ristàu comu nnu……..
No’ po’ murìri Brindisi. Po’ cangiari,
ma avà scapa’ li mègghiu a cuvirnàri!!!
Emanuele Castrignanò
Complimenti. Pertinente e profonda illustrazione della Brindisi di ieri e di oggi.